తమిళ హీరోలతో చరణ్ ఢీ!

హాలీవుడ్ స్థాయి సాంకేతిక ప్రమాణాలతో రూపొందిన 'మగధీర' చిత్రం పలు రికార్డులు సొంతం చేసుకుంటూ విజయవంతంగా 100 రోజులకు చేరువవుతోంది. ఇప్పటికే 62 కోట్లకు పైగా రికార్డు స్థాయి కలెక్షన్లు వసూలు చేసిన ఈ చిత్రం తమిళంలో విడుదలకు రంగం సిద్ధమవుతోంది. తమిళంలో డబ్బింగ్ చేస్తారా, రీమేక్ చేస్తారా అనే సస్పెన్స్ కు కూడా ఇప్పుడు తెరపడింది. అనువదించి విడుదల చేయడానికే గీతా ఆర్ట్స్ అధినేత అల్లు అరవింద్ నిర్ణయించారు. వచ్చే ఏడాది సంక్రాంతి కానుకగా తమిళనాట ఈ చిత్రాన్ని విడుదల చేసేందుకు ఆయన సన్నాహాలు చేస్తున్నారు.

తమిళనాట 'పొంగల్ ' రిలీజ్ ల పోటీ ఎక్కువగా ఉంటుంది. ఇందులో భాగంగానే స్టార్ హీరోలు విజయ్ నటించిన 'వేట్టైకారన్', అజిత్ నటించిన'అసల్' చిత్రాలు రిలీజ్ కానున్నాయి. ఈ రెండు చిత్రాలతో 'మగధీర'ను పోటీగా బరిలోకి దింపబోతున్నారు. తమిళ సూపర్ స్టార్ రజనీకాంత్ సైతం ఇటీవల చెన్నైలో 'మగధీర' చిత్రం స్పెషల్ స్క్రీనింగ్ చూసి రామ్ చరణ్ నటనను, చిత్ర సాంకేతిక ప్రమాణాలను కొనియాడటం కూడా ఈ సినిమాపై తమిళ ఆడియెన్స్ లో మంచి అంచనాలు రేకెత్తిస్తోంది. ఈ నేపథ్యంలో అక్కడి స్టార్ హీరోలకు 'మగధీర' గట్టి పోటీ ఇచ్చి విజేతగా నిలుస్తాడేమో చూడాలి...